حاكيني كلمة. بدي قلك شي. هيك بيناتنا. قرب توشوش بدينتك…إنت ما بتمثلني. لا إنت ولا هو ولا هو ولا هي ولا هيداك إلي مخبا وراء الحيط . حرام بيستحي بعرف.

بتعرف لي ما بتمثلني حضرة جنابك؟ سألت حالك شي مرة لي كل هل ناس فلت؟ عمرك فكرت فيي؟ عمرك فكرت بأي شي غير كرستك ومصرياتك؟ فكرك ما منعرف نحن إنو آخر همك لبنان وآخر همك الشعب اللبناني؟ بترجاك ما تقاطعني ، و بلاها هيدي الفلسفة والتفشيط والخطابات والروايات ، حفظناهم كلن كرجة مي.

المشكلة الأساسية إنو مشاكلنا ما عم يتغيروا. بعدن هني ذاتن عم نحكي فيون من سنة التسعين لليوم ما تغيروا. خيي خلينا نغيير عضرسنا ،جيبولنا مشاكل جداد آخر موضة.

أوقات بسأل حالي ، لو كنت مطرحك ، شو كنت عملت؟ هل رح يسمحلي هالنظام الطائفي القمعي الرجعي المضحك المبكي إنو أعمل شي لهل البلد الحزين قبل ما طق و موت؟